- 709 -

1447. März 1. o. O.

Entscheidung des liegnitzer Hauptmanns und Richters Sigmund von der Leippe und der Mannen über den Anspruch der Herzogin Elisabeth und Thomas Brockendorfs an das Lehn über die Mühle zu Prinkendorf.

Ich Sigmund von der Leippe, hewptman vnd gesatczter richter von meyner gnedigen frawen wegin zw Legnicz vnd dy gemeynen man doselbist Otto Czedlicz von Parchewicz, Heyncze Rothkirche von Panthenaw, Hannos Tycze, Anthonius Falkinhayn, Nickel Schelndorff, Michel Borewicz, Hentschil von Alczenaw, Albrecht Falkinhayn, Hans Pripticz, Hans Abstatsch, Thymo Brawchatsch, Bonczil Schiraw, Peter Landiskron vnd Heyncze Slewitcz bekennen, das vor vns mit wilkor kommen sind vnd vor dy gemeynen man, vnse gnedige frawe an eyme vnd Thomas Brockindorff am andern teile, als von der lehen wegen ober dy mole im dorffe zw Princkendorff gelegin, vnsere gnedige frawe hette befolen Cristoff Dornheym, der is warb zw den Edeln hern Niclas von Coldicz Crewczger des ordins von Rodisz vnd Heynczen von Panthenaw, die bekanten vor vns, das vnsere gnedige frawe en empoten habe, sie habe seyne furstlichen brife von eyme hern of den andern sagende gehort, zo irkenne ire gnade vnd sey is auch von den eren vndirrichtet, dassy nicht recht habe zw den lehen vbir dye mole in dem dorffe zw Primckendorff gelegen vnd welle em doreyn nicht halden, so ire gnade nicht recht dorczu habe, sonder irer lehen obir das dorff noch Brockindorfs eigenen furstlichen brifen, die wil ire gnade ir vnd eren nochkomen domete nicht obirgeben. Gescheen an der neesten metewoche noch dem sontage Inuocauit noch gotis geburt virczehnhundirt iar im sebinvndvirczigisten jare.

O. d. St. L. No. 391. An Pergamentstreifen zwei Siegel, das der Mannen und Sigmunds von der Leippe, beide verletzt.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866